Hér eru fyrstu drög að barnastefnu fyrir sveitarstjórnarkosningarnar (unnar á opnum fundum í samvinnu milli mismunandi félaga).
Vinsamlega farðu yfir og skilaðu umsögn um stefnuna hér að neðan í athugasemdum. Allar athugasemdir vel þegnar! Er verið að gleyma mikilvægum atriðum? Eitthvað sem mætti betur fara varðandi orðalag eða innihald? Ekki hika við að skella því í þína umsögn. Umsagnirnar verða svo teknar fyrir á sérstökum úrvinnslufundi þar sem umsagnarhöfundar eru hjartanlega velkomnir til að fylgja eftir sinni umsögn (skildu þá gjarnan eftir netfang fyrir fundarboðun á slíkan fund eða skráðu þig hér: https://forms.gle/xG8jL7hsEKTTuuip7).
Þekkirðu sérfræðing í málaflokknum og myndir vilja bera þetta undir hann og fá hans álit og umsögn? Ekki hika, það er frábær hugmynd! Sendu viðkomandi textann og skelltu svo inn umsögn í nafni viðkomandi ef viðkomandi er ekki skráður flokksmeðlimur.
Öllum verður frjálst að nýta sér drögin sem til verða til frekari vinnslu og samþykktar í sínu sveitarfélagi.
Ertu annars með góða hugmynd fyrir stefnumótun? Taktu þátt með því að mæta á fundi eða sentu inn þína hugmynd í hugmyndakassann hér að neðan.
Hægt er að að skrá sig á tengiliðalista fyrir málaflokka og fá sendar upplýsingar og áminningar um stefnumótunarfundarhöld þeim tengdum og senda inn hugmyndir í hugmyndakassann hér: https://forms.gle/xG8jL7hsEKTTuuip7
===============================================================
Fyrstu drög að barnastefnu - til umsagnar
(Núverandi stefnur um málefni barna: hlekkur)
Leiðarljós:
- Gæta skal að réttindum barna í hvívetna.
- Styðjum við barnafjölskyldur með fjölbreyttum leiðum.
- Eflum og virðum fagmennsku í öllu starfi með börnum.
- Stuðlum að góðri lýðheilsu barna, barnafjölskyldna og starfsfólks.
- Tryggjum jöfn tækifæri allra barna.
Markmið:
-Menntakerfið, tómstunda- og íþróttastarf sem og öll önnur þjónusta við börn mótist út frá þörfum barnsins fremur en kerfisins þannig að barnið fái að njóta vafans.-
-
Brjótum upp hinn hefðbundna skóladag, aukum flæði milli faga og kennslustunda og sköpum svigrúm til að víkja frá viðjum vanans með rými fyrir fjölbreyttar þarfir.
-
Íþróttastarf sé einstaklingsmiðað og metið út frá persónulegum árangri.
-
Mikilvægt er að öll börn njóti góðs af íþróttastarfi til 18 ára aldurs í skjóli fyrir afreksmiðaðri nálgun. Tryggja þarf að íþróttafélög sem starfa samkvæmt samningum við sveitarfélögin sinni öllum börnum sem vilja stunda íþróttir, en einblíni ekki fyrst og fremst á þau sem skara fram úr.
-
Stuðlum að fullnægjandi svefni barna og vinnutíma barna sem þjóni lífsklukku þeirra. Upphaf skóladagsins sé í takt við líkamsþroska barna og ungmenna sem geti opnað á nýja nálgun í tómstundastarfi, til dæmis á morgnanna.
-
Nám barna fari fram á skólatíma í stað heimanáms þannig að staðið sé vörð um frítíma barna og komið í veg fyrir að aðstöðumunur hafi áhrif á árangur.
-
Stutt sé við góðan skólaárangur og líðan barna með því að stuðla að því að börn tileinki sér yndislestur sem fyrst, í samvinnu við skóla og heimili.
-Sköpum gæðastundir og einblínum á að viðmót kerfisins sé hvetjandi.-
- Skóla-, frístunda- og tómstundastarf sé ánægjulegur vettvangur sem stuðlar að líkamlegri og andlegri heilsu og vellíðan barna.
- Börnum sé tryggð viðunandi og heilsusamleg aðstaða og umhverfi.
- Setja þarf markmið um að efla alhliða hreyfigetu og þroska sem er lykilatriði í velgengni í íþróttum og hreyfingu.
-Stuðlum að betra samfélagi fyrir börn, með auknum tíma með foreldrum, forvörnum og snemmtækri íhlutun.-
- Eflum tækifæri fjölskyldna til að verja meiri tíma saman, með áherslu á að efla tengslamyndun barna og forráðaaðila.
- Börn alist upp við öryggi með það að markmiði að síður verði þörf á stuðningi eða inngripi síðar á lífsleiðinni.
- Allar ákvarðanir í málefnum barna skulu vera gagnadrifnar, það er teknar með hliðsjón af bestu upplýsingum hverju sinni.
- Leggja skuli áherslu á að í öllu forvarnarstarfi sé gengið út frá “fræðslu en ekki hræðslu”,
- Beita skal snemmtækri íhlutun þannig að fjármagn vegna stuðnings sé ekki bundið við greiningar, en greiningum sé þó áfram beitt til að meta hvernig sé best að veita stuðning.
-Búum til öfluga lýðræðisborgara með sterka samfélagsvitund, víðsýni og gagnrýna hugsun.-
-
Skólakerfið á að undirbúa einstaklinga til að geta tekið þátt í samfélaginu.
-
Mikilvægt er að námið sé markvisst, faglegt og fjölbreytt, þar skarist ólíkir hópar og ólíkar kynslóðir og kerfið búi þau undir það að meta upplýsingar, taka ákvarðanir og bera ábyrgð á sjálfum sér og öðlist færni í að móta samfélagið.
-
Bjóðum upp á betri námsgögn sem tala saman þvert á námsgreinar og skólastig.
-
Áhersla sé á læsi í víðum skilningi og hagnýta samfélagsþekkingu eins og tæknilæsi, tæknifærni, nýsköpun, sköpun og fjármálalæsi.
-
Þróum Vinnuskólann áfram í þágu þess að efla víðsýni og samfélagsþekkingu barna og tengjum hann betur við aðra menntun og fjölbreytta fræðslu.
-
Styðjum við félagsþroska ungmenna og aukna fjölbreytni í valfögum með fleiri safnskólum á unglingastigi.
-Tryggja skal mannréttindi barna.-
- Réttur barna til friðhelgis einkalífs skal ávallt tryggður.
-Tryggja jafnrétti til náms, tómstunda og leiks óháð efnahag, uppruna, kynjum, kynhneigð, fötlun, stöðu og öðrum breytum.-
- Jafnréttisfræðsla og vinna gegn ofbeldi, áreitni og einelti þveri allt barnastarf.
- Tryggjum jafnréttis-, hinsegin og kynfræðslu fyrir öll börn á öllum skólastigum.
- Sálfræðiþjónusta og andlegur stuðningur sé í boði innan skólanna til að takast á við áskoranir nemenda.
- Fjölbreytni mannlífsins skal höfð að leiðarljósi sem og gagnkvæm virðing óháð sjónarhornum og skoðunum.
- Aðgengi að tónlistarnámi óháð efnahag með meðal annars skólahljómsveitum, hverfakórum og hóptónlistarnámi.
- Styðja við réttindi barns til tengslamyndunar við foreldra/forsjáraðila með sameiginlega forsjá eftir skilnað.
- Viðhöfð sé virk upplýsingagjöf og jafnrétti í þjónustu vegna barns sem foreldrar/forsjáraðilar eiga saman eftir skilnað.
- Bjóðum upp á ungmennahús með faglegu frístundastarfi fyrir ungmenni milli 16-20 ára í samstarfi við framhaldsskólana til að grípa þau ungmenni sem ekki fara í framhaldsskóla sem og að tryggja fullnægjandi félagslegan stuðning.
- Tryggja gjaldfrjálsa móðurmálskennslu og íslenskukennslu barna með annað móðurmál en íslensku.
- Vinna að jafnrétti til íþrótta og tómstundaiðkunar og gegn mismunun byggt á uppruna, kyni, kynhneigð, fötlun, fjárhag eða öðrum breytum. Styðjum við aukna notkun frístundakortsins meðal þeirra hópa sem nýta sér það minna en aðrir.
- Tryggjum fullnægjandi upplýsingar um íþróttir og tómstundir á öðrum tungumálum en íslenskum.
- Koma í veg fyrir að fjárhagsaðstæður takmarki tækifæri barna til tómstundaiðkunar, íþrótta eða félagslífs (LOI).
- Tryggjum jafnt aðgengi að leikskólavistun óháð efnahag og sköpum hvata til styttri dagvistunar með 6 tíma gjaldfrjálsum leikskóla.
- Eflum aðgengi að hinsegin félagsmiðstöðvum.
-Nýtum fagþekkingu og tækniþróun til að efla faglegt starf innan mennta og tómstunda-
- Stutt sé við hugmyndaauðgi, nýsköpun í kennsluháttum og þróun í menntakerfinu með fjölbreyttu rekstrarformi skóla.
- Lögð sé áhersla á endurmenntun starfsfólks.
- Beita skal gagnreyndum aðferðum.
- Eflum nýsköpunarmenntun og verkfærakistur til nýsköpunar.
- Styrkjum tæknilega innviði í skólakerfinu.
- Valdeflum starfsfólk og veitum þeim faglegan stuðning og hvatningu til að takast á við erfið verkefni og dafna í starfi.
- Sýnum því virðingu að leikskólinn er fyrsta menntastig barna.
- Styrkjum faglegar stoðir dagforeldrakerfisins.
-Tryggjum viðeigandi umönnun barna frá fæðingarorlofi, verum opin fyrir fjölbreyttum lausnum og komum til móts við barnafjölskyldur.-
- Uppfyllum þörfina fyrir fjölda leikskólaplássa frá fæðingarorlofi í nærumhverfi barnsins og styðjum við skilvirka nýtingu þeirra.
- Verndum lýðheilsu barna og stuðlum að tengslamyndun þeirra við foreldra/forsjáraðila sína með því að til dæmis takmarka hámarksdagvistunartíma í takt við styttingu vinnuviku.
- Gerum tilraunir með að bjóða upp á sumaropna leikskóla og frístund fyrir þau sem þess óska með möguleikum á að þróa verkefnið áfram byggt á endurgjöf.
- Gerum tilraunir með stuðningsgreiðslur til foreldra/forsjáraðila 12-15 mánaða barna sem ekki fá dagvistunarpláss eða velja af öðrum kosti ekki að setja börnin í umönnun utan heimilis með möguleikum á að þróa verkefnið áfram byggt á endurgjöf. Foreldrar/forsjáraðilar fái til dæmis 60% af kostnaði á barn á leikskóla á þessu tímabili.
- Gerum tilraunir með litlar einingar af foreldra-/forsjáraðilareknum ungbarnadeildum í sjálfstæðum rekstri fyrir 12 - 36 mánaða börn sem fjórir aðilar geti rekið saman. Krafa sé gerð um að eitt úr þeim hópi sé með grunnmenntun í félags- eða menntavísindum og að tveir karlar séu hluti af hópnum með því markmiði að styðja við aukna þátttöku karla í fæðingarorlofi og umönnun barna. Mikilvægt er að fjölga fyrirmyndum um nærandi feður fyrir unga drengi auk þess sem verkefnið sé hluti af því að brúa bilið.
